موضوعي تفسیر، پیژندنه، ارزښت، او کړنلاره

لنډیز

الحمد لله، والصلاة والسلام على سيدنا رسول الله، وعلى آله وصحبه ومن والاه، أما بعد:

قرآن کریم د الله تعالی کلام او د انسانانو د لارښوونې لپاره د  هغه سبحانه وتعالی له لورې آخرنې پیغام  دی، لدی امله چې دا مبارک کتاب د مسلمانانو د ژوند لارښود او رهنما دی، (هَـذَا بَيَانٌ لِّلنَّاسِ وَهُدًى وَمَوْعِظَةٌ لِّلْمُتَّقِينَ^[1] ژباړه: دا د خلكو له پاره ډانګ پيلې تنبيه ده او له الله نه وېرېدونكيو ته هدايت او نصيحت دى.

 مسلمانانو د تاریخ په اوږدو کې تر ننه پورې په هراړخیز ډول د دی ستر کتاب خدمت تر سره کړی، او دقیامت تر ورځې پورې به ان شاء الله دا لړۍ ادامه مومي، د امت سترو سترو علماو خپل ژوند د قرآن کریم د خدمت لپاره وقف کړی و او په ډګر کې یې بی ساري خدمتونه سر ته رسولي، د دی خدمتونو په لړ کې یو ډګر هم د قرآن کریم د تفسیر دی په سلګونو علماو او مفسرینو دا مبارک کتاب تفسیر کړی او د خپل توان سره سم یې قرآني مفاهیم د انسانانو مخ ته ایښي ، لله الحمد اوس موږ په اسلامي کتابتون کې په سلګونو چاپ او ناچاپ تفسیرونه لرو چې هر یو یې په خپل وار او خپل ځای قیمتي ملغلری لري.