د بهرنیو هېوادونو سره د اسلامي امارت اړیکې د اسلامي شریعت په رڼا کې

لنډیز

په دې مقاله کې تر هر څه دمخه د اسلام په رڼا کې د بهرنیو اړیکو په اهمیت او اړتیا خبره شوی، او دا خبره شوی چې دا باید د مصلحت او مفسدې د قاعدې لاندې وڅیړل شي، دا د ولاء او براء قضیه نه ده چې پر بنسټ یې د تکفیر بازار ګرم کړی شي، په اوسنیو شرایطو کې چې کوم هېوادونه وجود لري چې د یو اسلامي هېواد له لورې اړیکې ورسره ټینګي کړی شي دوه ډوله دي، لومړی: کافر هېوادونه، دویم: مسلمان هېوادونه، په پخوانیو فقهي کتابونو کې د کافرو هېوادونو سره په اړیکو بحث شوی، ځکه چې په هغه وخت کې اسلامي هېوادونه متعدد نه ؤ، او ټولو مسلمانانو د یو خلافت تر سیوري لاندې ژوند کاوه، په دې مقاله کې په دې بحث شوی چې د اسلامي هېوادونو تعدد باید شرعا د یو واقعیت په حیث ومنل شي، چې هلته خلک د خپلو امورو د تنظیم لپاره باید اداره رامنځته کړي، ځکه اسلام بې نظمي نه مني، مګر د دې هېوادونو په مشرانو کې د هیڅ هېواد مشر هم د خلیفة المسلمین حیثیت نه لري، او د دې مسلمانو هېوادونو سره هم باید د هماغه اصولو سره سم اړیکې جوړې کړی شي د کومو اصولو پر بنسټ چې د کافرو هېوادونو سره مسلمان هېواد اړیکي جوړوي، خو د اسلامي هېوادونو ترمنځ د اړیکو لپاره یوازې دوه اصله اضافه دي چې هغه د اسلامي اخوت، او د مسلمانانو ترمنځ د ولاء او دوستۍ اصل دی.